Autores de Palmeira

BIBLIOGRAFíA

X. PASTOR RODRíGUEZ SANTAMARíA:  Diccionario de Escritores Ribeirenses, A Coruña, Deputación Provincial da Coruña, 2001.

José Rodríguez Saavedra (O Freixo, 1893 - Palmeira, 1974)

Autodidacta, coñecido polo seu segundo apelido, foi un magnífico deseñador e constructor de barcos. Chegou a Palmeira en 1916 precisamente para construir barcos no varadoiro de Insuela, e foi  sendo ademais autor dunha novela publicada en 1961 co título Pandilla de eminencias (Vigo, Numen), da que Novo Salgado destaca que fai referencia á súa estancia en Huelva e que ten por protagonistas ós hóspedes dunha fonda desa cidade, case todos de orixe galega. 

Manuel González Vidal (Palmeira, 1942-1995)

Maquinista naval, ensinou na Escola de Náutica da Coruña, mais logo fíxose licenciado en Ciencias Económicas e Empresariais, e en 1979 foi nomeado xerente do Plan de Explotación Pesqueira de Galicia, pois no terreo da acuicultura está a súa especialidade. Publicou  El conflicto en el sector marisquero de Galicia (Madrid, Akal, 1980) e colaborou no volume colectivo Galicia. Realidad económica y conflicto social (A Coruña, 1978).  En galego é autor do volume A cuestión  marisqueira, que saíu do prelo en 1978.

Domingo Regueira González (Palmeira, 1945)

Colaborador de La Voz de Galicia con artigos sobre a bisbarra da Barbanza, é autor de Riveira desde sus orígenes (Ribeira, Concello, 1986) e do folleto Petroglifos cruciformes, cruceros y petos de ánimas. Riveira (Ribeira, Concello, 1986), ilustrado polo autor, que ven sendo unha guía sobre os cruceiros da vila de Ribeira.

Pemón Bouzas (Palmeira, 1957)

Fixo estudios de medicina e de socioloxía, aínda que se adicou fundamentalmente ó xornalismo, dende 1985 xa na TVG, onde dirixiu e presentou varios programas. En colaboración con Xosé A. Domelo (Santiago, 1965) é autor do volume Mitos, ritos y leyendas de Galicia. La magia del legado celta, publicado pola barcelonesa editorial Martínez Roca en 2000, que ós tres meses acadou xa unha segunda edición. A obra trata da mitoloxía celta, da romarías e doutras tradicións galegas populares, sen esquecer o tema xacobeo.

Manuel Gago Mariño (Palmeira, 1976)

Vinculado á Pobra do Caramiñal por súa nai, a súa familia paterna é de Palmeira. Traballa en Santiago como responsable de Medios de Comunicación do Consello da Cultura Galega.  Poeta e narrador, ten inédito o libro de poemas Episodio.  Sendo estudiante de C.O.U. gañou dous dos premios convocados polo Instituto Calvo Sotelo, un deles co relato "O muíño" e o outro coa serie de poesía "Cancioneiro do longo ollar".  Colaborou no volume colectivo El Catón Compostelano. Estudios (Santiago, Consello da Cultura Galega, 2000). Ademais no xornal La Voz de Galicia publicou o relato "A caída" (14-09-2000).  Tamén no ano 2000 publicou o volume O novo xornalismo electrónico (Santiago, Ed. Lea), en colaboración con X. López García e J. Pereira Fariña.

Ricardo Sanlés Martínez (Palmeira, 1916)

Frade mercedario, ocupou, entre outros cargos na súa Orde, o de Bibliotecario do Mosteiro de Poio. Autor dunha abundante obra erudita, publicou, entre outras, as obras Manual de los Capítulos Provinciales (Madrid, 1966), In memoriam (Madrid, 1970), Trayectoria misionera de la Merced en la conquista de América (Madrid, 1971), Nuevos documentos para la vida de Vicente Espiner (Madrid, 1973) e Aviamento y catálogo de misioneros a Indias y Filipinas en el siglo XVI (Madrid, 1979).

Manuel Teira Luaces (Palmeira, 1954)

Criouse na Pobra do Caramiñal dende a súa infancia.  Publicou poesías na revista Dorna e colaboracións xornalísticas en La Voz de Galicia como as tituladas "Antonio Paz Míguez, un literato pobrense que vive lonxe da súa terra e esquecido" (05-06-1988) e "Antón Avilés, unha emoción" (14-04-1993).  Na carpeta Xentes do Barbanza, publicada pola Mesa da Normalización Lingüística en 1988, publicou dous poemas sen título.  Outro artigo da súa autoría é: "Exercicio de imaxinación" (La Voz de Galicia, "Barbanza"' 26-01-1999), comentario do libro de relatos de Anxo Rei A sombra dos teus soños.  No ano 2000 a A.C. A Miserela editoulle o volume de poemas Detido nos confíns, caracterizado sobre todo pola presencia da poesía amatoria.

Vicente García Millán (Palmeira, 1843)

Médico Director do Balneario da Toxa en 1877, publicou artigos da súa especialidade coma o titulado "Sobre la acción antihelmíntica de las aguas de Loujo"' que apareceu no Anuario Oficial Estadístico de la Aguas Minerales de España, publicado en Madrid pola tipografía de Fortanet en 1887.  O nacer foi anotado como Vicente Millán, fillo de solteira, pero seu pai, Pedro García, recoñeceuno o 30 de outubro de 1851.

Antonio Martínez (Palmeira)

Foi Rector de San Pedro de Palmeira e colexial de Fonseca, onde entrou o 24 de marzo de 1608. Non nos consta ningún escrito seu, mais debeu facelos para optar ós graos académicos.

Lidia Martínez Fernández (Palmeira, 1972)

Diplomada en Maxisterio e Licenciada en Pedagoxía, é coautora do traballo "La educación de adultos en los programas de rehabilitación psiquiátrica para enfermos mentales", escrito en colaboración con Palmira Rodríguez Domínguez e publicado na revista Innovación Educativa (nº 10, 2000).

Pedro de Palmeira

Poeta medieval de quen conta o conde de Barçelos, don Pedro de Portugal, que morreu de amor por unha filla de Pelaio Curvo, casado cunha sobriña de Gelmírez. López Ferreiro supón que este Pedro de Palmeira puidese ser o Pero Rodríguez de Palmeira do que non conservaron composicións os cancioneiros medievais, cousa que non lle parece probable a António Resende de Oliveira.  Se ests identificación fose real, Pedro de Palmeira sería portugués e non natural da nosa bisbarra. O seu nome completo sería, para Resende, Pero Rodrigues de Palmeira, que viviría a fins do século XII.

BIBLIOGRAFíA

X. PASTOR RODRíGUEZ SANTAMARíA:  Diccionario de Escritores Ribeirenses, A Coruña, Deputación Provincial da Coruña, 2001.

José Antonio Pérez Fernández (Palmeira, 1966)

Licenciado en Xeografía e Historia, na especialidade de Historia Contemporánea, pola Universidade de Santiago de Compostela dende o ano 1989. Como estudiante desta Universidade formou parte do equipo fundador do Proxecto HISTORGA (Historia Oral de Galicia), dirixido polos profesores Isaura Varela e Marc Wouters, iniciativa pioneira en Galicia na aplicación da historia oral ós estudios dos acontecementos contemporáneos e que deu lugar ó nacemento do arquivo do mesmo nome que actualmente se pode consultar na universidade compostelana. Froito das investigacións realizadas para este proxecto é o seu capítulo sobre a guerra civil e a represión nos concellos de Ribeira e Pobra do Caramiñal, publicado no libro 1936. Os primeiros días de Marc Wouters editor (Edicións Xerais, 1993).

Sendo estudiante de bacharelato no Instituto Mixto de Ribeira foi membro fundador da revista “Diario Ceibe”. Anos máis tarde, en 1989, colaborou tamén na fundación da Asociación Cultural-Xuvenil “Col de Betas” de Palmeira, na que desempeñou o cargo de secretario.

Dende 1996 é profesor de ensino medio. Como tal participou no seminario permanente de vídeo do IES Francisco Asorey de Cambados, co que gañou o 2º premio no Certame de vídeo escolar do Ateneo de Pontevedra de 1997 polo vídeo titulado “O Mundo eléctrico” e o 2º premio do Certame do Centro de Recursos de Lugo polo vídeo “Unha curta historia” en 1998. Tamén impartiu varios cursos de Formación do Profesorado entre os anos 1997 e 1999, sobre o uso do vídeo como material didáctico para a clase Ciencias Sociais e sobre as técnicas de adestramento no baloncesto.

Á marxe do seu labor intelectual e profesional, foi membro do Consello Comarcal de Esquerda Unida do Barbanza a mediados dos anos 90.

Na actualidade é profesor no IES Leliadoura de Ribeira.

José Alvarez Castrelo (Palmeira, 1958)

Licenciado en Xeografía e Historia, especialidade de Historia Moderna.  Profesor de Ensino Secundario.

Libros:

- Síntesis Histórica de Palmeira 1600-1850. Santiago. 1985.

Artículos Revistas:

- IMO: Palmeira no 1929

- A CARAMECHA: Palmeira estala

- ZONA MARITIMA DO CANTABRICO. BOLETIN No. 4. Os Chaquetas Verdes de Sir John Moore.

- APUNTES PARA COÑECELO CONCELLO: Os Castelos de Ribeira.

- FAISCAS. No. 7: O comercio do polbo no interior de Galicia

Artículos Periódicos:

Diversas aportacións na Voz de Galicia salteadas no tempo desde 1981 a 1996, destacando as series de 1993 e 1994:

- Riqueza interna da Igrexa de Palmeira.

- Patente de Corso en Palmeira.

- Testamento e mentalidade ante a morte ata o século XIX

- A lenda dos Goyanes

- A destrucción do Castelo de Palmeira en 1467.

No Correo Gallego:

- O apodo de magorrentos.

TRABALLOS INEDITOS: O clero Compostela a mediados do XVIII. 1982.